السؤال ده بيدور فى رأس كل المقبلين على دراسة الشبكات وهو أدرس سيسكو ولا مايكروسوفت
ونصيحتى عن تجربة إنك لازم تدرس الاتنين لأنك بكده بترفع فرصتك فى الحصول على وظيفة فى مجال ال IT بشدة والموضوع مش صعب ولكن محتاج تركيز فى إختيار المنهج اللى تبدأ دراسته والشهادتين بيكملوا بعض يعنى واحده بتركز على الراوتر والسويتش وواحده بتركز على السيرفرات والحاجات دى مجتمعة هى اللى بتمثل قسم ال IT فى اى شركة وأنا أنصح كل المقبلين على دراسة الشبكات إنهم يبدأوا بدراسة CCNA والاسباب كالتالى:
1- مدته قصيرة وبيبدأ من الصفر فى الشبكات يعنى مش محتاج خلفية قبل ما تدرسه
2- هيعرفك كل المفاهيم الاساسية فى عالم الشبكات وبالتالى لما تنتهى منه وتبدأ فى دراسة ال MCITP او MCSA هتلاقى نفسك ما بتاخدش وقت فى دراسة المفاهيم لأنك بالفعل درستها هيبقى قدامك بس دراسة كيفية التنفيذ فى انظمة مايكروسوفت
3- اللى معاهم شهادة CCNA اقل بكتير من اللى معاهم MCITP يعنى مطلوبه جدا
4- الشهادة بداخلها منهج network + بالكامل لأننا زى ما قلنا شهادة تأسيسية فى عالم الشبكات وبتتطرق معاك للإحتراف واللى هتدرسه فيها هتلاقى زيه بالضبط فى شغلك يعنى مش مجرد شهادة مبتدئين
وما تنساش اى صاحب عمل محتاج واحد بس يقوم بالشغل كله بالذات فى قسم الحاسب الآلى وبالتالى هيدور على اللى بيفهم فى الراوتر والسويتش والسيرفر مع بعض لأن فى النهاية الراوتر والسويتش اتعمل عشان يخدم على السيرفر وجهاز العميل
بس اهم حاجه فى دراسة الشهادتين انك لازم تمتحن الدراسة فقط لا تكفى ومن الاخر مالهاش لازمه
بالنسبة ل اللى هيمتحن سيسكو لازم يعرف ان فيه شهادة CCNA جديدة هتبقى متوفرة من أول شهر اكتوبر 2013 ورقمها هو 200-120
واللى بيذاكر الشهادة القديمة اللى رقمها 640-802 يكمل مذاكرة عادى لأن إمتحانها شغال لغاية 30 سبتمبر 2013 ولما تحصل عليها هتفضل شغالة معاك عادى مدة 3 سنوات مش هتحتاج فى الفترة دى تعمل ترقية للشهادة الجديدة ولا حاجه والمنهج الجديد لسه معالمه ما اتضحتش لأن سيسكو لسه ما اعلنتش عن كتاب رسمى ليه بس التركيز فيه بصفة عامة على IPV6 والابواب اللى ليها شهادات مستقلة فى سيسكو اتشالت من المنهج الجديد زى الوايرلس والسيكيوريتى
بالنسبة للناس اللى هتمتحن مايكروسوفت لازم يعرفوا ان كل عروض الامتحانات آخرها شهر مايو 2013 وبعد كده مش هيبقى فيه عروض سواء على الاسعار او ال second shot
0
0
0